ჭამე მცირე ულუფებით, ჯანსაღი საკვები, მეტი ბოსტნეული, ნაკლები ცხიმი და ნახშირწყლები, ზომიერი რაოდენობით ხორცი და რძის პროდუქტები, ხილი. ეს რჩევები ყველას კარგად მოეხსენება, მაგრამ შესრულება ჭირს.

არის კიდევ რამე, რაც დაგვეხმარება წონის კონტროლში?

საკვების მიღების ჩვევა დიდ გავლენას ახდენს წონაზე.

პირველ რიგში, შეაფასეთ თქვენი კვებითი ჩვევები. ამისთვის დამხმარე შეიძლება იყოს საკვების დღიური, ჩაიწერეთ რას და რამდენს მიირთმევთ, როგორ გრძნობთ თავს, მშიერი ხართ, გაბრაზებული თუ დასტრესილი და ა.შ.

კვირის ბოლოს გაანალიზეთ თქვენი ჩანაწერები, ნუ იქნებით ძალიან კრიტიკურლი თქვენი თავის მიმართ, ცვლილებების შეტანა ერთდროულად არ არის საჭირო, მცირე ნაბიჯების გადადგმაც ჯანსაღი კვებისკენ კარგ გავლენას მოახდენს.

რა შევცვალოთ?

• პირველ რიგში, დაუკვირდით თქვენს ჩვევას, როდის ჭამთ? როდესაც მართლა გშიათ, თუ საკვების მიღება სტრესს გიხსნით, ან დაღლილობის გამო მიირთმევთ? სახლში შესვლისთანავე მაცივარს ხომ არ ამოწმებთ, მიუხედავად იმისა, როდის მიირთვით მანამდე?
• რას ჭამთ წახემსებისას? ნამცხვარს და ტკბილეულს? ჩაანაცვლეთ ხილით, თხილეულით და ჩირით. და იზრუნეთ, რომ სამსახურში, სადაც დღის უმეტეს ნაწილს ატარებთ, გქონდეთ ჯანსაღი წასახემსებელი.
• დალიეთ მეტი წყალი დღის განმავლობაში.
• შეეცადეთ დაგეგმოთ დღის ჯანსაღი მენიუ და სამსახურის დროზეც გათვალეთ, რა უნდა ჭამოთ, უმჯობესია, თუ სახლიდან წაიღებთ ლანჩს.

ახლა ცდუნებები შეაფასეთ და მოიფიქრეთ, რა ცვლილება გჭირდებათ:

• არის რაიმე, რაც გიბიძგებთ ჭამისკენ, როდესაც არ გშიათ?
• რატომ ჭამთ ნამცხვარს ან ცომეულს ჯანსარი საკვების ნაცვლად?

მიზეზები მრავალგვარი შეიძლება იყო, ჩახედეთ თქვენს დღიურს და ყველაზე ხშირი მიზეზი მოძებნეთ, მაგალითად:

ჭამთ ნამცხვარს, როდესაც ჩაუვლით კვების აპარატს და თქვენს საყვარელ ტკბილეულს დაინახავთ - შეცვალეთ მარშუტი. ტელევიზორის ყურებისას რეკლამა ან სხვა სანახაობა გიბიძგებთ ჭამისკენ - წესად დაიდეთ, რომ ტელევიზორის ყურებისას ან კომპიუტერთან მუშაობისას ჭამა აკრძალულია.

არ გაქვთ დაგეგმილი რა მიირთვათ საღამოს და დაღლილი რომ ბრუნდებით სახლში, სწრაფი კვება ყველაზე მარტივი გამოსავალია - დაგეგმეთ თქვენი ყოველდღიური მენიუ. სახლში და სამსახურში მუდმივად გაქვთ ტკბილეული და ცდუნებას ვერ უძლებთ - ჩაანაცვლეთ ჯანსაღი სნეკით, ოჯახის წევრებს შესთავაზეთ იგივე, ან სთხოვეთ, რომ თუ ტკბილეულს იყიდიან, თავისთვის შეინახონ.