A ჰეპატიტი არის ღვიძლის ინფექცია, რომელიც გამოირჩევა მაღალი კონტაგიოზურობით (გადაცემის მაღალი მაჩვენებლით) და გამოწვეულია A ჰეპატიტის ვირუსით. იწვევს ღვიძლის ანთებას და უარყოფით გავლენას ახდენს ღვიძლის ფუნქციონირებაზე.

A ჰეპატიტით ინფიცირების გამომწვევი შეიძლება იყოს დაბინძურებული საკვების და წყლის მიღება, ან ინფიცირებულ ადამიანთან, ან ობიექტთან მჭიდრო კონტაქტი. A ჰეპატიტის მსუბუქი შემთხვევები არ საჭიროებს მკურნალობას. ინფიცირებულთა უმეტესობა სრულად იკურნება, ღვიძლის მუდმივი დაზიანების გარეშე.

ჰიგიენის სწორად დაცვა, მათ შორის ხელების ხშირი დაბანა, ხელს უშლის ვირუსის გავრცელებას. 

სიმპტომები

A ჰეპატიტის სიმპტომები ჩვეულებრივ ვლინდება ვირუსის დაწყებიდან რამდენიმე კვირაში. მაგრამ A ჰეპატიტის მქონე ყველა ადამიანს არ უვითარდება სიმპტომები. 

სიმპტომები შეიძლება მოიცავდეს:

• უჩვეულო დაღლილობა და სისუსტე
• უეცარი გულისრევა, ღებინება და დიარეა
• მუცლის ტკივილი ან დისკომფორტი მარჯვენა ფერდქვეშა არეში
•  უფერო ან ნაცრისფერი განავალი
• მადის დაკარგვა
• დაბალი ტემპტერატურა 
• მუქი შარდი
• სახსრების ტკივილი
• კანისა და თვალის სკლერების  გაყვითლება
• ინტენსიური ქავილი

ეს სიმპტომები შეიძლება იყოს შედარებით მსუბუქი და გაქრეს რამდენიმე კვირაში. თუმცა, ზოგჯერ A ჰეპატიტი იწვევს მძიმე დაავადებას, რომელიც გრძელდება რამდენიმე თვე.

როდის მივმართოთ ექიმს

დაჯავშნეთ ექიმ ინფექციონისტთან კონსულტაცია, თუ გაქვთ A ჰეპატიტის სიმპტომები.

ასევე, სასწრაფოდ უნდა მიმართოთ ექიმს, თუ:

• ახლახანს იმოგზაურეთ ისეთ ადგილებში, სადაც გავრცელებულია ვირუსი, განსაკუთრებით მექსიკაში, ცენტრალურ და სამხრეთ ამერიკაში.
• მიიღეთ საკვები რესტორანში, სადაც გავრცელებულია A ჰეპატიტი.
• ცხოვრობთ ადამიანთან, რომელსაც აქვს A ჰეპატიტი.
• გქონდათ სქესობრივი კონტაქტი A ჰეპატიტით ინფიცირებულ ადამიანთან.

პრევენცია

დაიცავით უსაფრთხოების ზომები მოგზაურობისას.

თუ მოგზაურობთ მსოფლიოს იმ ნაწილებში, სადაც A ჰეპატიტი გავრცელებულია, მიიღეთ შემდეგი ზომები ინფექციის თავიდან ასაცილებლად:

• გარეცხეთ ყველა ახალი ხილი და ბოსტნეული ნაყიდ (ბოთლში ჩამოსმულ) წყალში და თავად გააცალეთ კანი. 
• მოერიდეთ წინასწარ დაჭრილ ხილსა და ბოსტნეულს.
• არ მიირთვათ უმი ან არასაკმარისად მოხარშული ხორცი და თევზი.
• დალიეთ ბოთლში ჩამოსხმული წყალი და გამოიყენეთ ის კბილების გახეხვისას.
• მოერიდეთ ყველა, საეჭვო სისუფთავის სასმელს. იგივე ეხება ყინულსაც.
• თუ ბოთლში ჩამოსხმული წყალი მიუწვდომელია, აადუღეთ ონკანის წყალი მის დალევამდე ან ყინულის გასაკეთებლად გამოყენებამდე.

ზედმიწევნით დაიცავით ზოგადი ჰიგიენის ნორმები.

ხშირად და კარგად დაიბანეთ ხელები, განსაკუთრებით ტუალეტის გამოყენების ან ჰიგიენური საშუალებების გამოცვლის შემდეგ და საკვებთან შეხებამდე.