გენიტალური ჰერპესი

გენიტალური ჰერპესი არის გავრცელებული სქესობრივად გადამდები ინფექცია, რომელიც გამოწვეულია ჰერპეს სიმპლექსის (მარტივი ჰერპესის) ვირუსის მიერ (HSV). სქესობრივი კონტაქტი წარმოადგენს დაინფიცირების პირველად გზას. ინფიცირების შემდეგ იმ შემთხვევაშიც თუ ჩატარდა ანტივირუსული თერაპია, ორგანიზმი ხდება ვირუსის მტარებელი და ის წლის განმავლობაში რამდენჯერმე აქტიურდება, შესაბამისად სიმპტომების არქონა არ ნიშნავს ვირუსისგან განკურნებას. 

რა იწვევს გენიტალურ ჰერპესს

გენიტალურ ჰერპესს, როგორც უკვე ვახსენეთ იწვევს ჰერპეს სიმპლექსის ვირუსი : 

• HSV-1 – ეს არის ჰერპესის ტიპი, რომელიც იწვევს სითხის შემცველი ბუშტუკების მქონე გამონაყარს პირის არეში. ის როგორც წესი ვრცელდება კანით-კანთან კონტაქტის მეშვეობით, თუმცა გენიტალური ჰერპესის განვითარების გზა ამ შემთხვევაში მოიცავს ორალურ სქესობრივ კონტაქტსაც. 
• HSV-2 – ეს არის გენიტალური ჰერპესის გამომწვევი ძირითადი ტიპი, რომელიც ვრცელდება პირდაპირი სქესობრივი ან კანით-კანთან კონტაქტით. მას გააჩნია მაღალი ინფიცირების ხარისხი და ის იჭრება ორგანიზმში დამოუკიდებლად კანის დაზიანების ქონისა. 

გამომდინარე იქიდან, რომ ვირუსი ორგანიზმის გარეთ სწრაფად იღუპება, თითქმის შეუძლებელია მისით დაინფიცირება საზოგადოებრივ ტუალეტებთან, ხელსახოცებთან ან დაინფიცირებული ადამიანის საყოფაცხოვრებო ნივთებთან კონტაქტის მეშვეობით.

გენიტალური ჰერპესის სიმპტომები

ჰერპესის ვირუსით დაინფიცირებული ადამიანების უმეტესობამ ამის შესახებ არ იცის, რადგან მათ აქვთ ან მსუბუქი გამოვლინება ან ინფექცია მიმდინარეობს უსიმპტომოდ. 

როდესაც ხდება დაინფიცირება, სიმპტომების გამოვლენა ვირუსის ორგანიზმში მოხვედრის შემდეგ ხდება 2-დან 12 დღემდე. 

თუკი თქვენ გამოგივლინდათ გენიტალური ჰერპესის სიმპტომები, ისინი იქნება შემდეგნაირი: 

• ტკივილის ან ქავილის შეგრძნება გენიტალიების არეში
• მცირე ზომის მოწითალო გამონაყრის არსებობა, რომელიც შეიცავს თეთრი ფერის ბუშტუკებს
• წყლულების გაჩენა – წყლული შესაძლოა ფორმირდეს მას შემდეგ რაც ბუშტუკები გასკდება და დაიწყებს სითხის ან სისხლის ჟონვას. წყლულების გაჩენას როგორც წესით ახლავს ხოლმე მტკივნეული შარდვა
• გარქოვანება – წყლულის მოშუშების შემდეგ არსებული ადგილები დაიწყებენ აქერცვლას და გარქოვანებას.

ვირუსთან პირველი კონტაქტის დროს შესაძლოა გამოვლინდეს არა მარტო გენიტალური, არამედ გრიპის მსგავსი  სიმპტომებიც : თავის ტკივილი, კუნთების დაჭიმულობა, ცხელება და ლიმფური კვანძების გადიდება საზარდულის მიდამოებში. 

არსებული სიმპტომების გამოვლენის შემთხვევაში, გართულებების თავიდან არიდების მიზნით აუცილებლად უნდა მიმართოთ თქვენს მეან-გინეკოლოგს. 

რა შეიძლება გამოიწვიოს გენიტალურმა ჰერპესმა

ისევე, როგორც სხვა ინფექციურ დაავადებებს, გენიტალურ ჰერპესსაც გააჩნია სხვადასხვა გართულებები, ესენია : 

• სხვა ინფექციებით დაინფიცირების გაზრდილი რისკი – მათ შორის აივ ინფექცია.
• ახალშობილთა დაინფიცირება – ბუნებრივი მშობიარობისას, გენიტალური გზების გამოვლის დროს ახალშობილი შესაძლოა დაინფიცირდეს ჰერპესით, რაც იწვევს თავის ტვინის დაზიანებას, სიბრმავეს ან სიკვდილს. 
• შარდვის პრობლემები – გარკვეულ შემთხვევებში წყლულების გაჩენამ შესაძლოა გამოიწვიოს ანთებითი პროცესების პროვოცირება, რაც აღმავალი გზით შესაძლოა გავრცელდეს შარდსადენზე. ანთებისგან გამოწვეულმა შეშუპების პროცესმა შესაძლოა რამდენიმე დღით გამოიწვიოს შარდსადენის შევიწროება და შარდის შეგუბება შარდის ბუშტში. 
• რექტალური ინფექცია (პროქტიტი) – მიეკუთვნება ანალური სქესობრივი კონტაქტის გზით მიღებულ გართულებას 

გენიტალური ჰერპესის მკურნალობა

პირველ რიგში უნდა აღინიშნოს, რომ გენიტალური ჰერპესი ბოლომდე არ იკურნება. სიმპტომური მკურნალობა მოიცავს რიგ ანტივირუსულ პრეპარატებს, რომლებიც მხოლოდ ზემოთ ხსენებულ ჩივილებს შეამცირებს, თუმცა ორგანიზმი ჰერპესის მტარებლად მაინც დარჩება.