ანემია

ანემია არის მდგომარეობა, როდესაც ორგანიზმში არ მოიპოვება საკმარისი სისხლის ჯანსაღი წითელი უჯრედები, იმისათვის, რომ მოხდეს ქსოვილების ადექვატური გამდიდრება ჟანგბადით. 

სისხლის წითელი უჯრედები შეიცავს ჰემოგლობინს - რკინით მდიდარ ცილას, რომელიც სისხლს წითელ შეფერილობას აძლევს. ჰემოგლობინი საშუალებას აძლევს სისხლის წითელ უჯრედებს გადაიტანონ ჟანგბადი თქვენი ფილტვებიდან სხეულის ყველა ნაწილამდე.

სისხლის უჯრედების უმეტესობა, მათ შორის წითელი უჯრედები, რეგულარულად წარმოიქმნება ძვლის ტვინში. ჰემოგლობინისა და სისხლის წითელი უჯრედების წარმოებისთვის თქვენს სხეულს ესაჭიროება რკინა, ვიტამინი B-12, ფოლიუმის მჟავა და სხვა ნუტრიენტები საკვებიდან.

ანემიის მრავალი ფორმა არსებობს, თითოეულს თავისი მიზეზი აქვს. ანემია შეიძლება იყოს დროებითი ან ხანგრძლივი და შეიძლება ვარირებდეს მსუბუქიდან მძიმემდე. უმეტეს შემთხვევაში, ანემიის გამომწვევი ერთზე მეტი მიზეზია. აუცილებლად მიმართეთ ექიმს, თუ ეჭვი გაგიჩნდათ, რომ გაქვთ ანემია. ეს შეიძლება იყოს სერიოზული დაავადების გამაფრთხილებელი ნიშანი. 

გამოყოფენ ანემიის ტიპებს : 

• აპლასტიური ანემია
• რკინადეფიციტური ანემია
• ნამგლისებრუჯრედოვანი ანემია
• თალასემია
• ვიტამინ-დეფიციტური ანემია

რა იწვევს ანემიას

ანემია შეიძლება განვითარდეს დაბადებისას არსებული მდგომარეობებით (თანდაყოლილი) ან გამოწვეული იყოს გარე ფაქტორების ზემოქმედებისგან (შეძენილი). 

ანემიის რისკ ფაქტორებს წარმოადგენს : 

• გარკვეული ვიტამინებით და მინერალებით ღარიბი კვება – ესენია რკინა, B12, ფოლიუმის მჟავა და სპილენძი. ამ მექამიზმით განვითარებული ანემია ხშირია ვეგეტარიანელებში 
• კუჭ-ნაწლავის დარღვევები – რომელიც ხელს უშლის ნუტრიენტების შეწოვას (მაგ. კრონის დაავადება)
• მენსტრუაცია – ჭარბი რაოდენობის გამონადენისას (მენორაგია) ან მენოპაუზის გვიან დადგომის შემთხვევაში
• ორსულობა – რისკ ფაქტორია თუ თქვენ არ იღებთ მულტივიტამინებს და ფოლიუმის მჟავით ან რკინით მდიდარ საკვებს ან დანამატებს
• ასაკი – ანემია მარტივად ვითარდება 65 წელს გადაცილებულ ადამიანებში
• ქრონიკული დაავადებები – მაგალითად სიმსივნე, თირკმლის უკმარისობა, კუჭის წყლული და სხვა ქრონიკული მდგომარეობები

ანემიის ნიშნები

ანემიის ნიშნები და სიმპტომები განსხვავდება მისი გამომწვევი მიზეზისა და სიმძიმის მიხედვით, თუმცა ახლადგანვითარებული ანემიის დროს შესაძლოა სიმპტომები არ გამოვლინდეს

ნიშნები და სიმპტომები, თუ ისინი გამოიკვეთება, შემდეგნაირია:

• დაღლილობა
• სისუსტე
• ფერმკრთალი ან მოყვითალო კანი
• არარეგულარული გულისცემა
• Ჰაერის უკმარისობა
• თავბრუსხვევა 
• ტკივილი გულმკერდის ღრუში
• ცივი ხელები და ფეხები
• თავის ტკივილი

არსებული სიმპტომების გამოვლენის შემთხვევაში თქვენ უნდა მიმართოთ ჰემატოლოგს, რომელიც შეარჩევს თქვენთვის აუცილებელ მკურნალობის ტაქტიკას.

ანემია ორსულებში 

მსუბუქი ფორმით ანემიის ქონა ორსულობის პერიოდში ნორმას წარმოადგენს, თუმცა მძიმე ფორმებში ანემიის არსებობამ შესაძლოა გამოიწვიოს ისეთი გართულებები როგორიცაა ნაადრევი მშობიარობა. 

ორსულობისას ანემიის განვითარების რისკ-ფაქტორებს წარმოადგენს 

• მრავალნაყოფიანობა
• ორი დროში ერთმანეთთან ახლოს არსებული ორსულობა
• ჭარბი პირღებინება ტოქსიკოზის გამო
• ორსულობა მოზარდებში
• რკინით ღარიბი საკვების მიღება

ანემიის მკურნალობა

ანემიის მკურნალობა, რომელიც დამოკიდებულია მიზეზზე, მერყეობს დანამატების ორალურად მიღებიდან სისხლის ტრანსფუზიამდე. ყველაზე მნიშვნელოვანია, რომ თქვენ შეგიძლიათ თავიდან აიცილოთ ანემიის განვითარება ჯანსაღი, მრავალფეროვანი დიეტის მიღებით.